სახელგანთქმული აკადემიკოსის, სიმონ ყაუხჩიშვილის დაბადების 125 წლისთავთან დაკავშირებით, წმიდა საყდრის დესპანი, მისი აღმატებულება მონს. ჟოზე ბეტანკური შეხვდა საქართველოს მეცნიერებათა ეროვნული აკადემიის პრეზიდენტს, აკადემიკოს გიორგი კვესიტაძეს. აკადემიკოსი გიორგი კვესიტაძე ამ პრესტიჟული დაწესებულების პრეზიდენტად არჩეულ იქნა 2013 წელს. საქართველოს მეცნიერებათა ეროვნული აკადემია დაარსდა 1941 წელს და აერთიანებს მეცნიერების სხვადასხვა დარგებში მოღვაწე ცნობილ აკადემიკოსებს. აკადემია წარმართავს და ხელს უწყობს სამეცნიერო კვლევებს საქართველოში, ამყარებს ურთიერთობებს მსოფლიოს წამყვან მეცნიერებთან და სამეცნიერო ცენტრებთან.
წმიდა საყდრის დესპანმა, მონს. ჟოზე ბეტანკურმა და აკადემიკოსმა გიორგი კვესიტაძემ განიხილეს საქართველოს მეცნიერებათა ეროვნული აკადემიის საქმიანობა, მისი ძალისხმევა გააერთიანოს ქართველი მეცნიერები და წარმართოს კვლევითი სამუშაოები სამეცნიერო დაწესებულებებისა და ცენტრების მეშვეობით. საქართველოს მეცნიერებათა ეროვნული აკადემია თავის შეკრებებზე განიხილავს ქვეყნისა და მეცნიერული პროგრესისთვის საჭირბოროტო თემებს, რომელიც ძალზე საინტერესოა საქართველოში წმინდა საყდრის დესპანისთვისაც.
წმიდა საყდრის დესპანმა ისაუბრა გაცვლების საჭიროებაზე საქართველოს მეცნიერებათა ეროვნულ აკადემიასა და ვატიკანის სოციალურ მეცნიერებათა პონტიფიკურ აკადემიას შორის, რომელიც დაარსებულია 1603 წელს და რომლის რიგებშიც ნობელის პრემიის არაერთი ლაურეატია მსოფლიოს სხვადასხვა ქვეყნიდან. ამგვარი ურთიერთობები ორივე მხარისთვის სასარგებლო იქნებოდა.
სახელგანთქმული კათოლიკე მეცნიერის, დიდი ისტორიკოსის და ფილოლოგის, სიმონ ყაუხჩიშვილის (1895-1981) იუბილის აღნიშვნით პატივს მივაგებთ სხვადასხვა რელიგიისა და კუთხის წარმომადგენელ ყველა ქართველს, რომლებმაც თავიანთი ცხოვრება მიუძღვნეს აკადემიურ მოღვაწეობას და საკუთარი სამშობლოსთვის უკეთესი მომავლის შექმნას.