სულხან-საბა ორბელიანის სახელობის უნივერსიტეტი – კათოლიკური უმაღლესი სასწავლებელი საქართველოში
ორშაბათს, 2020 წლის 13 ივლისს, თბილისის სულხან-საბა ორბელიანის სახელობის უნივერსიტეტის (საბაუნი) რექტორი, დოქტ. ვაჟა ვარდიძე, უნივერსიტეტის ადმინისტრაციული პერსონალი და პროფესორ-მასწავლებლები შეიკრიბნენ საზაფხულო სემინარზე წეროვანში. საუბარი შეეხო ეკლესიის სოციალურ სწავლებასთან დაკავშირებულ საკითხებსა და უნივერსიტეტის განვითარების გეგმას, რომელიც გულისხმობს სტუდენტებისთვის თანამედროვე და ქმედითი საგანმანათლებლო სერვისების მიწოდებას. 2021 წელს სულხან-საბას სახელობის უნივერსიტეტი აღნიშნავს მისი დაარსების 20 წლისთავს, რომელსაც საამაყო მიღწევებით ხვდება. საბაუნი გახლავთ სახელმწიფოს მიერ აკრედიტებული და საერთაშორისოდ აღიარებული კათოლიკური ინსტიტუტი. შეხვედრას ესწრებოდნენ უნივერსიტეტის დამფუძნებელი, ეპისკოპოსი ჯუზეპე პაზოტო და წმიდა საყდრის დესპანი, მონს. ჟოზე ა. ბეტანკური, რომლებმაც ისაუბრეს უმაღლესი განათლების ქრისტიანულ ასპექტებზე.