საკვირაო ლოცვის – ანჯელუს დომინის დროს, პაპი ფრანცისკე ლოცულობს კავკასიაში მშვიდობისთვის 19.VII. 2020

„ძვირფასო ძმანო და დანო, პანდემია ჯერ კიდევ არ დასრულებულა და მსურს გამოვხატო ჩემი თანადგომა მათ მიმართ, ვინც ებრძვის ამ დაავადებას თუ მის სოციალურ-ეკონომიკურ შედეგებს. განსაკუთრებით მაფიქრებს იმ ხალხების მდგომარეობა, რომელთა ტანჯვასაც კიდევ უფრო ამძიმებს საომარი ვითარება. გაერთიანებული ერების უშიშროების საბჭოს ახლანდელი რეზოლუციის საფუძველზე, კვლავ მოვუწოდებ მებრძოლ მხარეებს ცეცხლის საყოველთაო და დაუყოვნებლივი შეწყვეტისკენ. ეს საშუალებას მოგვცემს უზრუნველვყოთ მშვიდობა და უსაფრთხოება, რაც აუცილებელია ჰუმანიტარული დახმარების გასაწევად. 

კერძოდ, შეშფოთებით ვადევნებ თვალს სამხრეთ კავკასიის რეგიონში, ბოლო დღეების განმავლობაში განვითარებულ მოვლენებს – შეიარაღებული დაძაბულობის გამწვავებას სომხეთსა და აზერბაიჯანს შორის. ვლოცულობ ბრძოლებში დაღუპულთა  ოჯახებისთვის და გამოვთქვამ იმედს, რომ საერთაშორისო საზოგადოების ძალისხმევით, დიალოგისა და მხარეთა კეთილი ნების მეშვეობით შესაძლებელი გახდება მშვიდობიანი, ხანგრძლივი და ორივე მხარისთვის სასიკეთო გამოსავლის პოვნა. გულითადად მივესალმები რომაელ მრევლსა და იტალიელ თუ უცხოელ მომლოცველებს. 

ყველას გისურვებთ ბედნიერ კვირადღეს. გთხოვთ, ნუ დაგავიწყდებათ ილოცოთ ჩემთვის. გისურვებთ გემრიელ სადილს და გემშვიდობებით მომავალ შეხვედრამდე.“