კარდინალი პიეტრო პაროლინი საქართველოში
პაპი ფრანცისკეს სახელმწიფო მდივანი სტუმრობს საქართველოს ახალი 2020 წლის წინადღეს
2019 წლის 27-30 დეკემბერს საქართველოს ოფიციალურ ვიზიტად სტუმრობდა პაპი ფრანცისკეს სახელმწიფო მდივანი, მისი მაღალი ყოვლადუსამღვდელოესობა კარდინალი პიეტრო პაროლინი. ვიზიტის ფარგლებში იგი შეხვდა საქართველოს ხელისუფალთ, რათა განეხილა ორმხრივ ურთიერთობებთან დაკავშირებული საკითხები და ეროვნული თუ საერთაშორისო პრობლემები. წმიდა საყდარი იმ სახელმწიფოებსა და საერთაშორისო ორგანიზაციებს შორის იყო, რომლებმაც სხვებზე უწინ სცნეს საქართველოს დამოუკიდებლობა და რეზიდენციული საელჩოები გახსნეს თბილისში (წიდა საყდრის სადესპანო). 2019 -2020 წლებში წმიდა საყდარი და საქართველო მნიშვნელოვან თარიღებს ზეიმობენ, განსაკუთრებით, საქართველოში კათოლიკური ეკლესიის ყოფნასთან დაკავშირებით. კერძოდ, კარდინალმა პაროლინმა იზეიმა სამხრეთ კავკასიაში ლათინური წესის კათოლიკეთა სამოციქულო ადმინისტრაციის დაარსების 25 წლისთავი; კალკუტელი დედა ტერეზას „სიყვარულის მისიონერთა“ საქართველოში ჩამოსვლის 30 წლისთავი; „საქართველოს კარიტასის“ დაარსების და სტიგმატელ მამათა ჩამოსვლის 25 წლისთავი. აღინიშნა სხვა მნიშვნელოვანი მოვლენებიც: კათოლიკოს-პატრიარქი ილია II-ის ვატიკანში ისტორიული ვიზიტის 40 წლისთავი; პაპი იოანე პავლე II-ის თბილისში ისტორიული ვიზიტის 20 წლისთავი; შეზღუდული შესაძლებლობების პირთა საზოგადოება „კიდობნის“ („შუქი და რწმენა“) დაარსების 25 და თბილისის მარ შიმონ ბარ საბაეს სახელობის ასირიულ-ქალდეური წესის კათოლიკური ეკლესიის გახსნის 10 წლისთავი. კარდინალი ესტუმრა კათოლიკური ეკლესიის სხვადასხვა ინსტიტუტებს და შეხვდა საქართველოში არსებული სამი კათოლიკური წესის – სომხური, ასირიულ-ქალდეური და ლათინური წესის წარმომადგენლებს. კათოლიკოს-პატრიარქ ილია II-ისა და სინოდის სხვა წევრებთან შეხვედრა გახლავთ გამოხატულება კათოლიკურ ეკლესიასა და საქართველოს მართლმადიდებელ ეკლესიებს შორის არსებული ძმური ურთიერთობებისა. ვიზიტის განმავლობაში სახელმწიფო მდივანმა მოინახულა ადმინისტრაციული სასაზღვრო ზოლი. კარდინალი პაროლინი პირველად სტუმრობდა საქართველოს. იგი გახლდათ წმიდა საყდრის სახელმწიფოებთან ურთიერთობის მდივნის მოადგილე 2008 წლის კონფლიქტის დროს, როცა პაპმა და წმიდა საყდარმა არაერთი ინიციატივა განახორციელეს საერთაშორისო ფორუმებზე საქართველოში მშვიდობისა და ქვეყნის ტერიტორიული მთლიანობის მხარდასაჭერად.
